ဓါတ်ပုံသတင်း

(တန်းတူရေးနှင့် ကိုယ်ပိုင်ပြဋ္ဌာန်းခွင့်အတွက် တိုက်ပွဲဝင်မည်ဟုဆို)

မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး ကျောင်းသားတပ်မတော် (၃၆) နှစ်မြောက် ဖွဲ့စည်းတည်ထောင်ခြင်း အထိမ်းအမှတ်အခမ်းအနားကို ယမန်နေ့ နိုဝင်ဘာလ ၁ ရက်နေ့တွင် ဗဟိုဌာနချုပ် ဒေါင်းတမန်စခန်း၊ မြောက်ပိုင်းဗဟိုဌာနချုပ်၊ စစ်ကြောင်း (၂) နှင့် စစ်ကြောင်း (၃) စသည့် နယ်မြေဒေသ အသီးသီးတွင် ကျင်းပပြုလုပ်ခဲ့ကြောင်း ABSDF က ထုတ်ပြန်ထားသည်။

တန်းတူရေးနှင့် ကိုယ်ပိုင်ပြဋ္ဌာန်းခွင့်ကိုအာမခံသော ဖက်ဒရယ်ပြည်ထောင်စုတည်ဆောက်ရန် တိုက်ပွဲဝင်သွားမည်ဟု ကျောင်းသားတပ်မတော် ABSDF က ပြောသည်။

ကျောင်းသားတပ်မတော် ဥက္ကဌ ရဲဘော်သံခဲ က “ ဒီမိုကရေစီရေး၊ တန်းတူရေးနဲ့ ကိုယ်ပိုင်ပြဋ္ဌာန်းခွင့်ကို အာမခံတဲ့ ဖက်ဒရယ်စနစ်ကို ပုံဖော်မယ့် ပြည်ထောင်စုသစ်တခု တည်ဆောက်ရေးဆိုတဲ့ နိုင်ငံရေးရည်မှန်းချက်ကို ရောက်ဖို့ စစ်အာဏာရှင်စနစ် ဆန့်ကျင်ရေးအင်အားစုတွေကြားမှာ ဘုံသဘောထားတွေချမှတ်ရင်း လက်တွေ့ အတူတကွ လက်တွဲတိုက်ပွဲဝင်နိုင်ဖို့ ကြိုးစား သွားကြရမယ်” ဟု ပြောသည်။

ABSDF ကျောင်းသားတပ်မတော်၏ ဦးတည်ချက် ၄ ရပ် ဖြစ်သော အဖိနှိပ်ခံတိုင်းရင်းသား ပြည်သူလူထုတရပ်လုံး စစ်အာဏာရှင်စနစ်အောက်မှ လွတ်မြောက်ရေး၊ ဒီမိုကရေစီရေးနှင့် လူ့အခွင့်အရေး၊ ပြည်တွင်းငြိမ်းချမ်းရေး၊ ဖက်ဒရယ်ပြည်ထောင်စု ပေါ်ထွန်းရေး စသည့် နိုင်ငံရေးဦးတည်ချက်များအတွက် ဘဝများစွာ စွန့်လွှတ်ပေးဆပ်ခဲ့ရသည်ကိုလည်း သမိုင်းမှတ်တမ်းအဖြစ် ဂုဏ်ယူတန်ဖိုးထားကြောင်း သိရသည်။

လူမျိုးပေါင်းစုံ တိုင်းရင်းသား ပြည်သူ လူထုကြီးနှင့်အတူ ဒီမိုကရက်တစ် ဖက်ဒရယ်ပြည်ထောင်စု နိုင်ငံတော်သစ် ပေါ်ထွန်းရေးအတွက် ကျရာအခန်းကဏ္ဍများတွင် တက်ကြွစွာ လက်တွဲဆောင်ရွက်သွားမည်ဟု ယခုကျရောက်သည့် ကျောင်းသားတပ်မတော် ဖွဲ့စည်းတည်ထောင်ခြင်း ၃၆ နှစ်မြောက်နေ့မှာ ABSDF က ထုတ်ပြန်ပြောဆိုခဲ့သည်။

ရှမ်းမြောက်ဒေသ သိန္နီခရိုင် သံလွင်မြို့နယ် အီနိုင်းကျေးရွာကို ယနေ့ အောက်တိုဘာလ ၁၄ ရက် နံနက် ၁ နာရီခန့်အချိန်တွင် ပေါင်ချိန်များသော ဗုံး ၃ လုံးနှင့် ဗုံးအသေးစား ၄ လုံးဖြင့် အာဏာသိမ်း စစ်ကောင်စီက ဗုံးကြဲတိုက်ခိုက်ခဲ့ကြောင်း ကိုးကန့်သတင်းက ထုတ်ပြန်ထားသည်။

အဆိုပါ ဗုံးကြဲတိုက်ခိုက်ခံရမှုများကြောင့် အီနိုင်ကျေးရွာက အရပ်သား ၃ ဦး နေရာ၌ သေဆုံးသွားခဲ့ရပြီး ၃ ဦးမှာ ဒဏ်ရာပြင်းထန်စွာ ရရှိခဲ့ကြသည်။

ဆက်လက်ပြီး အီနိုင်းကျေးရွာက နေအိမ် ၂၀ ကျော်နှင့် ဆေးခန်း၊ ခရစ်ယာန်ဘုရားရှိခိုးကျောင်း၊ အခြား အများအပြည်သူဆိုင်ရာ အဆောက်အအုံများ အတိုင်းအတာတစ်ခုအထိ ထိခိုက်ပျက်စီးခဲ့ရသည်။

အောက်တိုဘာလ ၁၂ ရက်နေ့ကလည်း သိန္နီခရိုင် သံလွင်မြို့နယ် နမ့်ပေါင်ကျေးရွာကို ဗုံးကြဲတိုက်ခိုက်ခဲ့ပြီး စာသင်ကျောင်းပျက်စီးသွားကာ အရပ်သားတစ်ဦး ညာလက်မောင်းမှာ ဒဏ်ရာရရှိခဲ့သည်။

ဗုံးပေါက်ကွဲမှုကြောင့် စာသင်ကျောင်းပျက်စီးခဲ့သည့်အပြင် အနီးနားရှိ မိသားစုမှ မွေးမြူထားသည့် နွားနှစ်ကောင်ကိုလည်း ဗုံးစထိမှန်ကာ ဒဏ်ရာရရှိခဲ့ကြောင်း ကိုးကန့်သတင်းက ထုတ်ပြန်ထားသည်။

အောက်တိုဘာလ ၁ ရက်နေ့က အီရန်နိုင်ငံမှ အစ္စရေးနိုင်ငံကို ၁၉ တန်ခန့်လေးပြီး ၃၇ ပေရှည်လျားသော ဒုံးကျည်များဖြင့် ပစ်ခတ်တိုက်ခိုက်ခဲ့သည်။

အီရန်နိုင်ငံက အစ္စရေးကို ဒုံးကျည် ၁၈၁ လုံးပစ်လွှတ်ခဲ့ပြီး အစ္စရေးဘက်က ကြားဖြတ်တိုက်ခိုက်ခဲ့ကာ အသေအပျောက်အများဆုံးဖြစ်ရပ်ကို ရပ်တန့်နိုင်ခဲ့ကြောင်း အစ္စရေးတပ်ဗိုလ်မှူး G ဆိုသူက ပြောသည်။

“ကျွန်တော်တို့ရဲ့ ကာကွယ်ရေးတွေက သူတို့ထဲက အများစုကို ရပ်တန့်နိုင်ခဲ့ပြီး အစုလိုက်အပြုံလိုက် အသေအပျောက်အများဆုံးဖြစ်ရပ်ကို ရပ်တန့်နိုင်ခဲ့ပါတယ်” ဟု ဆိုသည်။

ပဲ့ထိန်းဒုံးကျည် ၁၈၁ လုံးထဲက ကြားဖြတ်တိုက်ခိုက်၍ ပျက်စီးသွားသော အီရန်ပဲ့ထိန်းဒုံးကျည်တစ်လုံး၏ အခွံကို အစ္စရေးစစ်တပ်က အောက်တိုဘာလ ၉ ရက်တွင် ကမ္ဘာကို ပြသခဲ့သည်။

အဆိုပါ အီရန်ပဲ့ထိန်းဒုံးကျည်မှာ ထိပ်ဖူး တစ်တန်လေးပြီး တစ်နာရီလျှင် ၃,၁၀၀ မိုင်နှုန်း မြန်ကြောင်းနှင့် လူဦးရေ ၂၈,၀၀၀ နေထိုင်ရာ အရတ်ဒ်မြို့အရောက် ၁ မိုင်အလိုတွင် အသံထက် ၅ ဆမြန်သည့် Arrow 3 ဖျက်ဒုံးဖြင့် အစ္စရေးစစ်တပ်က ပစ်ချဖျက်ဆီးနိုင်ခဲ့ခြင်းဖြစ်သည်။

အစ္စရေးတပ် ဗိုလ်မှူး G ဆိုသူက “ဒါဟာ အစ္စရေးတွေကို တတ်နိုင်သမျှ သတ်ပစ်ဖို့ အောက်တိုဘာ ၁ ရက်နေ့က ပစ်လွှတ်လိုက်တဲ့ ပဲ့ထိန်းဒုံးကျည် ၁၈၀ ထဲက တစ်ခုပဲ ဖြစ်ပါတယ်” ဟု ပြောသည်။

အစ္စရေးစစ်တပ်က တန်ပြန်ပစ်ခတ်၍ ပျက်စီးသွားသော ၃၇ ပေရှည်လျားသည့် အီရန်ဒုံးကျည်ခွံကို အနီးအနားကလေးငယ်များက ပထမဆုံး တွေ့ဆုံခဲ့ပြီးနောက် အစ္စရေးစစ်တပ်က စစ်ဆေးကာ ကမ္ဘာကို အီရန်ဒုံးကျည်ဖြစ်ကြောင်း ချပြခဲ့ခြင်းဖြစ်သည်။

Ref: thesun.co.uk

ရခိုင်ပြည်မှာ လက်နက်ကိုင်တိုက်ပွဲများကြောင့် နေရပ်စွန့်ခွာထွက်ပြေးနေရသူ ဒုက္ခသည် ၆ သိန်းကျော်ရှိပြီး လက်ရှိတွင် ဒုက္ခသည်များမှာ အငတ်ဘေးဖြင့် ရင်ဆိုင်ကြုံတွေ့နေကြောင်း စစ်ရှောင်များက ပြောဆိုကြသည်။

စစ်တွေမြို့နယ်က စစ်ကောင်စီ နှင်ထုတ်ခဲ့သည့် ပလ္လင်ပြင်၊ အောင်တိုင်၊ ဝါဘိုနှင့် အမြင့်ကျွန်းအပါအဝင် တခြားကျေးရွာ အများအပြားက ဒေသခံများမှာ စစ်ရှောင်နေပြီး စားဝတ်နေရေး အလွန်ခက်ခဲနေသည်ဟု သိရသည်။

ပုဏ္ဏားကျွန်းမြို့က ဒေသခံပြည်သူများမှာ အလုံးစုံ မြို့ထဲသို့ ဝင်ရောက်နိုင်ခြင်းမရှိဘဲ ကျွဲထိုး၊ သလူမော်၊ ခမောင်းတော၊ အောင်ဇေယျနှင့် တခြားကျေးရွာအချို့တွင် စစ်ရှောင်နေကြပြီး စားနပ်ရိက္ခာ ပြတ်တောက်နေပြီဟု ရွာသားများက ပြောသည်။

ပေါက်တောမြို့နယ်တွင်လည်း တောင်ဦးမော်၊ သဲခုံ၊ ကြိမ်ခွေမော်အပါအဝင် ရသေ့တောင်၊ ဘူးသီးတောင်၊ မောင်တော၊ သံတွဲ၊ ဂွမြို့နယ်တို့တွင် စားနပ်ရိက္ခာပြတ်တောက်မှုနှင့် ကျန်းမာရေးစောင့်ရှောက်မှုများ မခံယူရဟု ဒေသခံများက ပြောဆိုကြသည်။

အငတ်ဘေးဖြင့် ကြုံနေရသည့်အကြောင်းကို ပေါက်တောမြို့နယ် သဲခုံကျေးရွာဒေသခံတစ်ဦးက ယခုလိုပြောသည်။

“ကျနော်တို့ စစ်ရှောင်နေတဲ့ နေရာမှာဆို အိမ်ထောင်စုပေါင်း ၄၀၀ ကျော်လောက်ရှိတယ်။ စားရေးသောက်ရေး အဆင်မပြေဘူး။ ငတ်တဲ့သူတွေ များလာတယ်။ ဘာထောက်အပံ့မရဘူး။ စစ်ဘေးရှောင်ရတဲ့ ကာလကလည်း ရှည်လာတယ်။ တော်တော် ဒုက္ခရောက်နေကြပြီ” ဟု ဆိုသည်။

ယင်းအပြင် ပုဏ္ဏားကျွန်းမြို့နယ်က စစ်ရှောင်များမှာလည်း တောင်းရမ်းစားသောက်ရသည့်အဆင့်အထိ အငတ်ဘေးဖြင့် ကြုံနေရသည်ဟု စစ်ရှောင်အရေး ကူညီဆောင်ရွက်နေသည့် လင်းရောင်ခြည်ဖောင်ဒေးရှင်းမှ တာဝန်ရှိသူတစ်ဦးက ပြောသည်။

“စစ်ဘေးရှောင်တွေထဲမှာ တောင်းရမ်းစားသောက်လာကြသူတွေ တစ်စတစ်စ များလာတာမျိုးတွေ့လာရပါတယ်။ စစ်ဘေးရှောင်တွေအတွက် တတ်နိုင်သလောက်ကူညီမှုတွေ လုပ်ပေးနေပေမယ့် အားလုံး အကူညီပေးနိုင်တဲ့အတိုင်းအတာက နည်းနေသေးတော့ သူတို့အတွက် ထောက်ပံ့ကူညီမှုတွေ ထပ်လိုအပ်နေပါသေးတယ်” ဟု ပြောသည်။

ရခိုင်ဒေသတွင် ဒုတိယအကြိမ်မြောက် တကျော့ပြန်တိုက်ပွဲ စတင်ပြီးနောက်ပိုင်း လူသားချင်းစာနာထောက်ထားမှုဆိုင်ရာ အကူအညီပေးနေကြသည့် နိုင်ငံတကာအဖွဲ့အစည်းများ၏ ကူညီထောက်ပံ့မှုများမှာ ပြတ်တောက်သွားခြင်းကြောင့် စစ်ရှောင်များမှာ ရပ်တည်ရေး ခက်ခဲနေကြခြင်းဖြစ်သည်။

ရခိုင်မှာ ၁၇ မြို့နယ်ရှိသည့်အနက် ၇ မြို့နယ်က ဒေသခံပြည်သူများမှာ အိုးအိမ်စွန့်ခွာ ထွက်ပြေးနေကြရပြီး စစ်ရှောင်ကာလ ၁၀ လအထိ ရှည်လာကာ အမိုးအကာမလုံခြုံသည့် နေရာများတွင် နေထိုင်ရခြင်းနှင့် စားနပ်ရိက္ခာပြတ်လပ်နေကြသည်။

မောင်တောမြို့သိမ်းတိုက်ပွဲအတွင်း ဖမ်းဆီးရမိသည့် စစ်သုံ့ပန်းများအား ခေတ္တထိန်းသိမ်းထားသည့် လေးမိုင် နခခ-၂ တပ်စခန်းကို အာဏာသိမ်း စစ်ကောင်စီက စက်တင်ဘာလ ၉ ရက် ည ၉ နာရီခွဲတွင် ဂျက်ဖိုက်တာဖြင့် လေကြောင်း ဗုံးကြဲတိုက်ခိုက်ခဲ့သည်။

အဆိုပါ AA ၏ အကျဉ်းစခန်း နခခ-၂ တပ်စခန်းမှာ တိုက်ပွဲအတွင်း ဖမ်းဆီးရမိထားသော စစ်ကောင်စီတပ်ဖွဲ့ဝင်များ၊ မွတ်ဆလင်လက်နက်ကိုင်တပ်ဖွဲ့ဝင်များ၊ စစ်ကောင်စီသတင်းပေးများနှင့် အကျဉ်းသားများအား ထိန်းသိမ်းထားသည့် စခန်းဖြစ်သည်။

စစ်ကောင်စီ ဗုံးကြောင့် နေရာ၌ စစ်သုံ့ပန်း ၅၀ ကျော် သေဆုံးသွားပြီး အများအပြား ဒဏ်ရာ ပြင်းထန်စွာ ရရှိသွားကြပြီး ဒဏ်ရာရသူများအားလုံးကို အာရက္ခတပ်တော် AA က ဆေးကုသပေးနေကြောင်း သိရသည်။

မောင်တောမြို့သိမ်းတိုက်ပွဲမှာ ဆက်လက်ပြင်းထန်လျှက်ရှိနေပြီး အာဏာသိမ်း စစ်ကောင်စီတပ်ဖွဲ့ဝင်များ၊ မွတ်ဆလင်လက်နက်ကိုင်တပ်ဖွဲ့ဝင်များနှင့် စစ်ကောင်စီ သင်တန်းဆင်း မွတ်ဆလင်များက အာရက္ခတပ်တော် AA ကို တိုက်ခိုက်နေကြောင်း သိရသည်။