Western News 
ကရင်ပြည်နယ်၊ ကြာအင်းဆိပ်ကြီးမြို့နယ် ဘုရားသုံးဆူဘက်မှ စစ်ကောင်စီတပ်သား ၅ ဦးသည် ယခုရက်ပိုင်းအတွင်း ထိုင်းနိုင်ငံ ကန်ချနဘူရီခရိုင် ဘုန်တီကျေးရွာလမ်းကြောင်းမှတစ်ဆင့် ထိုင်းနိုင်ငံသို့ ထွက်ပြေးသွားကြောင်း သိရသည်။
အာဏာသိမ်း စစ်ကောင်စီက ထွက်ပြေးသွားသည့် စစ်သား ၅ ဦးကို ဖမ်းဆီးပြီး ပြန်လည်ပို့ဆောင်ပေးရန် ထိုင်းအစိုးရကို တောင်းဆိုထားကြောင်း သိရသည်။
ထိုင်းအာဏာပိုင်းများကလည်း စစ်ကောင်စီ တောင်းဆိုသည့်အတိုင်း ဆောင်ရွက်နိုင်ရန် ထွက်ပြေးလာသည့် တပ်သား ၅ ဦးကို ဖမ်းဆီးရန် ကန်ချနဘူရီခရိုင်တွင် လိုက်လံရှာဖွေနေကြောင်း ဆိုသည်။
ကန်ချနဘူရီခရိုင်က ပြည်သူများကိုလည်း ထိုင်းအာဏာပိုင်များက အသိပေးပြောကြားထားပြီး တပ်သား ၅ ဦးနှင့် ပတ်သက်၍ သတင်းပေးကြရန် ညွန်ကြားထားကြောင်း သိရသည်။
ထွက်ပြေးလာသည့် စစ်ကောင်စီတပ်သား ၅ ဦးကို ဓါတ်ပုံနှင့်တကွ ရှာဖွေနေပြီး ကန်ချနဘူရီခရိုင်အတွင်း ကျေးရွာများနှင့် ပြည်သူ့စစ်များထံ ဖြန့်ဝေထားကြောင်း သိရသည်။
သို့သော် အဆိုပါ တပ်သား ၅ ဦး၏ ကိုယ်ရေးအချက်အလက်များကိုမူ ထိုင်းအစိုးရဘက်က အသေးစိတ်ထုတ်ပြန်ထားခြင်းမရှိပေ။
မြန်မာနိုင်ငံသားများမှာ ဘုရားသုံးဆူ – ကန်ချနဘူရီ လမ်းကြောင်းမှတစ်ဆင့် ထိုင်းနိုင်ငံအတွင်းသို့ တရားမ၀င် ၀င်ရောက်လာခြင်းကြောင့် ဖမ်းဆီးခံမှု များပြားလာနေကြောင်း ထိုင်း-မြန်မာနယ်စပ်မှာရှိသည့် ဒေသခံများက ပြောဆိုကြသည်။