ရခိုင်က မွတ်ဆလင်အမျိုးသမီးများကို AA အမျိုးသမီးရေးရာအဖွဲ့မှ စွမ်းရည်မြှင့် ဟောပြောပွဲများ ပြုလုပ်ပေးနေ

2

Western News| ဧပြီ ၂၄

ရခိုင်ပြည်အတွင်းမှာ နေထိုင်ကြသည့် မွတ်ဆလင်အမျိုးသမီးများကို အာရက္ခတပ်တော် AA အမျိုးသမီးရေးရာအဖွဲ့မှ ရခိုင်ကျောင်းသားသမဂ္ဂအဖွဲ့နှင့် ပူးပေါင်းပြီး အမျိုးသမီးများစွမ်းရည်မြှင့် ဟောပြောပွဲများကို ပြုလုပ်ပေးနေသည်။

မွတ်ဆလင်ကျေးရွာများသို့ ကွင်းဆင်းပြီး မွတ်ဆလင်အမျိုးသမီးများနှင့် တွေ့ဆုံကာ အမျိုးသမီးအခန်းကဏ္ဍ မြင့်မားလာရေး ဆောင်ရွက်နေသည်ဟု AA အမျိုးသမီးရေးရာ တာဝန်ရှိသူများက ပြောသည်။

ဘူးသီးတောင်၊ မောင်တော၊ မြောက်ဦးနှင့် ကျောက်တော်မြို့နယ်တို့တွင် ယခုလ ဧပြီလကစ၍ အမျိုးသမီးများ စွမ်းဆောင်ရည်မြင့်မားလာ‌ရေး ဟောပြောပွဲများကို ဆောင်ရွက်နေပြီး အခြားသော မြို့နယ်များတွင်လည်း လုပ်ဆောင်ပေးသွားမည်ဟု သိရသည်။

ရခိုင်မှာ လူမျိုးပေါင်းစုံနေထိုင်ကြပြီး တန်းတူအခွင့်အရေးများဖြင့် တိုင်းပြည် တည်ဆောက်နေကြသည့် အတွက် မွတ်ဆလင်အမျိုးသမီးများကိုလည်း တန်းတူအခွင့်အရေးများ ပေးအပ်မှုများကို ကြိုဆိုကြောင်း မြောက်ဦးဒေသခံ မွတ်ဆလင်အမျိုးသမီးတစ်ဦးက ပြောသည်။

မွတ်ဆလင်အမျိုးသမီးများအနေဖြင့် အာရက္ခဒေသ တည်ဆောက်ရာတွင် ပညာရေး၊ ကျန်းမာ‌ရေး၊ အမျိုးသမီးအရေးနှင့် ဖွံ့ဖြိုးတိုးတက်ရေးကဏ္ဍများတွင် ပူးပေါင်းပါဝင်ကြလည်းရန်လည်း သူမက တိုက်တွန်းထားသည်။

ရခိုင်၊ မွတ်ဆလင် မခွဲခြားဘဲ ရခိုင်ပြည်မှာ နေထိုင်ကြသော လူမျိုးတိုင်း တန်းတူအခွင့်အရေး ရရှိရေးနှင့် တိုင်းပြည်တည်ဆောက်ရာတွင် ကျောသားရင်းသား မခွဲခြားဘဲ တတ်နိုင်သည့်ဘက်မှ ပါဝင်နိုင်ရေးအတွက် ယင်းကဲ့သို့ မွတ်ဆလင်အမျိုးသမီးများကို စွမ်းဆောင်ရည်မြှင့် ဟောဟောပြောပွဲများ ပြုလုပ်ပေးရခြင်းဖြစ်သည်ဟု AA အမျိုးသမီးရေးရာ တာဝန်ရှိသူတစ်ဦးက ပြောဆိုထားသည်။

ယခင်က ရခိုင်မှာ အုပ်ချုပ်သူများသည် မွတ်ဆလင်အမျိုးသမီးများအား စွမ်းဆောင်ရည်မြှင့်သင်တန်းများ၊ ဟောပြောပွဲများ ပြုလုပ်ပေးခြင်းမရှိခဲ့သည့်အတွက် ယခု AA က လုပ်ဆောင်ပေးခြင်းအပေါ်မှာ ကျေးဇူးတင်ကြောင်း ဆိုသည်။

ထို့အပြင် အခြားသော မျိုးနွယ်စုများဖြင့် တန်းတူအခွင့်အရေး ပေးအပ်ခြင်းကို လက်ခံကြိုဆိုကြောင်းလည်း ကျောက်တော်ဒေသခံ မွတ်ဆလင်အမျိုးသမီးများက ပြောသည်။